| Taarifa kwa vyombo vya Habari JAJI WARIOBA ACHA KULALAMIKA MNAVUNA MLICHOPANDA Imetolewa na Shaweji Mketo, Naibu Mkurugenzi Mipango, Uchaguzi na Bunge Agosti 10, 2012 CUF – Chama cha Wananchi tumesikitishwa na kauli ya Mwenyekiti wa Tume ya Mabadiliko ya Katiba, Jaji Joseph Warioba ya kuwataka Viongozi wa vyama vya siasa, asasi za kiraia, vikundi vya kidini na wanaharakati kutowafundisha wananchi maoni ya kuchangia kwenye mikutano ya Tume. Jaji Warioba aliyasema hayo Jijini Dar es salaam jana alipokuwa akizungumza na Waandishi wa habari kwa lengo la kuwapatia mrejesho wa mikutano iliyofanywa na tume yake kwa kipindi cha mwezi mzima katika mikoa minane, alifafanua kuwa vyama vya siasa vimekuwa vikitoa kauli na maelekezo kwa wanachama wao ili wafuate misimamo ya vyama, jambo ambalo linawanyima uhuru wa kutoa maoni yao. CUF – Tunalaani lengo baya la siri walililokuwa nalo Tume hiyo ya kuratibu maoni la kutarajia kuwakuta wananchi wanaochangia ni mambumbu wasiojua lolote kwa makusudi, na hili linathibitishwa kwa kudharau ushauri tulioipa Tume hiyo ya kuwataka kutoa elimu ya Katiba kwa Wananchi kabla ya kuanza zoezi la kukusanya maoni hayo. CUF – Tunawapongeza na kuwashukuru Viongozi wa Vyama vya siasa,Taasisi mbambali zilizojitolea kutoa elimu ya Katiba kwa wanachama wao na wananchi wengine ili angalau kuwa na uelewa juu ya mapungufu na mazuri yaliyomo ndani ya katiba iliyopo kabla ya kuchangia maoni kwa Katiba mpya ijayo. Ni muhimu Jaji Waioba akatambua kuwa vyama vya siasa moja ya jukumu lake ni kujenga ushawishi kwa wananchi ili wapate kuungwa mkono kwa lengo la kukamata dola. Kwa kuwa Katiba itakayopatikana itakuwa mwongozo kwa vyama vyote kwa ujumla lakini ikiwa ndiyo dira kuu kwa chama kitakachopata mamlaka ya kuongoza nchi ni jambo lisilo epukika kwa vyama kujiweka kando na mchakato huo mbele ya wananchi wanaotarajia kuwapa ridhaa. Inatia mashaka zaidi ikiwa Tume inatambua na inahimiza maoni ya taasisi mbalimbali kuhusu mabadiliko ya Katiba hii, iweje leo anasema haipaswi kwa vyama kuwashawishi wananchi juu utoaji wa maoni ya Katiba? Au vyama inaongoza akina nani, kwani Jaji anataka katiba iwe na mambo gani pekee ambayo yanaweza kuharibiwa na vyama? Hatutoacha kuwaelekeza wadau wetu juu ya mapungufu na mazuri yaliyomo katika Katiba na yanayohitajika kuwemo katika Katiba mpya kwa mustakabali mwema wa Taifa letu. HAKI SAWA KWA WOTE Kwa mawasiliano zaidi 0716 226642/0718 717364 Taarifa kwa vyombo vya Habari IGP DHIBITI JESHI LAKO LA USALAMA WA BARABARANI LITAMALIZA WANANCHI Imetolewa na Abdul Kambaya, Naibu Mkurugenzi Habari, Uenezi na Haki za Binadamu, Agosti 10, 2012 CUF – Chama cha Wananchi tumepokea kwa masikitiko makubwa sana taarifa za ajali za barabara zinazoendelea kutokea mara kwa mara hapa nchini, ikiwemo ajali iliyotokea juzi eneo la Kitunda, wilayani Sikonge mkoani Tabora ambapo basi la Sabena lilipinduka na kuua watu 17 na wengine 78 kujeruhiwa. Basi hilo aina ya Scania lenye namba ya usajili T 570 AAM, lililokuwa likitokea Tabora kwenda Mbeya, na kwa mujibu wa vyombo vya Habari vilivyohoji baadhi ya abiria waliosalimika katika ajali hiyo, walisema kuwa basi hilo lilikuwa limebeba zaidi ya abiria 110 na dereva wa basi hilo alikuwa akiendesha kwa mwendo kasi, licha ya abiria kulalamika kwa Polisi wa Usalama barabarani ambao nao hawakujali, dereva wa basi hilo aliendelea kuendesha kwa mwendo kasi hadi lilipomshinda na kupindukua. CUF – Chama cha Wananchi tunamtaka IGP Said Mwema kulikagua jeshi lake la Polisi, hususan kitengo cha usalama barabarani, ambapo uzembe umekithiri na kuna kila dalili ya rushwa kushamiri katika kitengo hicho, kuwawajibisha vinginevyo yeye mwenyewe awajibike kwa maafa ya wananchi yanayoendelea kutokea siku hadi siku ambayo yanaweza kuepukika, ili hali hizi ni nguvu kazi za Taifa. CUF – Tunawasihi madereva kutambua kuwa mwendo kasi unamaliza binadamu wenzao na wengine kupata ulemavu wa kudumu, ukiachia wale wanaoteseka kwa maumivu makali hospitalini. Lakini pia tunawapa pole wale waliojeruhiwa na kumuomba Mwenyezi Mungu awape ahueni mapema na kuwataka wale wote waliopoteza ndugu na jamaa zao kuwa na subira katika kipindi hiki kigumu cha majonzi na Mwenyezi Mungu aziweke roho za marehemu mahali pema peponi, AMIN!!! HAKI SAWA KWA WOTE Kwa mawasiliano zaidi 0718 717364/0719 566567 | 
0 comments:
Post a Comment